- 273 -

1372. Febr. 21. Liegnitz.

Rathmannen, Geschworene und Handwerkmeister der Stadt Liegnitz stellen auf Gesuch des Herzogs Ruprecht seiner Gemahlin Hedwig eine Versicherung über ihr Leibgedinge aus.

Wir statlewthe der stat Legnicz, gesworne vnd hantwerkmeyster vnd dy gancze gemeyde do seibist, dy iczunt sint, odir hernoch czukumftig werden, bekennen offenbar an dysem briue, daz wir von gebote vnd geheyze der irluchten fursten, herczogen Ruprecht, herczogen in Slezien, herre czu Legnicz, vnses lyben, gnedigen herren, haben gehuldt, globt vnd gesworan der irluchten forstynne, vnser lyben, gnedigen frowen, frowen Hedwygen, syner elichen howsvrowen vnd czu irre hant den hochgebornen forsten, herczog Heinrich, dem heldsten vnd herczog Heinrich, dem yvngsten, gebrudern vnd herren czu Glogow vnd czum Sagan vnd ouch dem irlvchten fvrsten herczog Heinrichen, herre czu Troppow, alz rechten vormunden, von alle dem teile, daz dez vorgenanten vnsers herren herczog Ruprecht ist, odir noch von recht werden mochte czu Legnicz an der stat, czu eyme rechteii lypgedinge czu yrme lybe, dy wyl sy lebt, noch vnses vorgenanten herren herczog Ruprechtis tode, ab her ows dyser werld schyde, daz got nichten welle, ir getrewe vnd gewer vnd gehorsam czu syn, alz vnser rechten erbvrowen von dem vorgenanten vnsis herren herczog Ruprechtis teyle, ane arg, ane alle argelist. Ouch hab wir gelobt, ob dyselbe vorgenante, vnse lybe gnedige vrowe das vorgenante yr lypgedinge, daz ir von vnsis herczogis Ruprechtis teil wurde, vflasen odir sich vorczyen weide, dy wyle sy lebt, daz sal keyne craft noch macht haben, iz sy mit der vorgenanten hochgebornen fvrsten yrre vormunde wyssende gvnst vnd willen in svlcher moze wert, daz vnse vorgenante genedige vrowe ows dirre werlde schyde odir stvrbe, daz got nichten welle, so sollen wir der gelobde von den vorgenanten hochgebornen fursten irre vormunde ledig vnd loz syn, vngemant dez gelobdis vnd der hvldvng. Czu grosir sicherheit hab wir desin brif mit vnserm grozen ingesigil vorsiglt czu Legnicz an dem nesten svnobende vor dem nesten sontage, alz man synget in der heylichen kyrchen Reminiscere, noch gotis geburt dryczenhvndert yar in dem czwey vnd sybenczigsten yar.

Aus dem liegn. Stadtbuch ab anno 1372, fol. 1. — Nicht völlig treu und richtig abgedruckt bei Thebesius II, S. 226 und danach bei Sammter, Chron. v. Liegn. S. 476.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866